Երեւան (Երկիր) - ԱՄՆ նախագահի վարչակազմը պետք է օգտագործի պետքարտուղար Քլինթոնի այցը Հարավային Կովկաս Ղարաբաղյան կարգավորման եւ հայ-թուրքական հաշտեցման գործընթացներում իր չհաջողած քաղաքականությունը վերանայելու համար. «Ազատություն» ռադիոկայանին ասել է ՀՅԴ Ամերիկայի Հայ Դատի հանձնախմբի գործադիր տնօրեն Արամ Համբարյանը:
Նրա խոսքերով` եթե Քլինթոնի այցը քաղաքականությունը վերագնահատելու ցանկությամբ է արվում, ապա դա դրական զարգացում է, իսկ եթե վերաամրագրելու են վերջին 18 ամիսների բացասական ավանդույթները, ապա այցը լավատեսություն չի ներշնչում:
Համբարյանի կարծիքով` ամենաճիշտ քայլը, որ ԱՄՆ պետքարտուղարը կարող է անել, Հայոց ցեղասպանության զոհերի հուշահամալիր այցելելն է եւ այդ ոճիրը ճանաչելու վերաբերյալ հայտարարությամբ հանդես գալը:
«Այս վարչակազմը գնալով ավելի սխալ ուղղությամբ է շարժվում. նախընտրական քարոզարշավի ժամանակ Ցեղասպանության ճանաչման խոստումից այն շարժվեց դեպի այս հարցի շուրջ լռության քաղաքականություն, այնուհետեւ պարզապես չճանաչեց, հետո ավելի հեռուն գնաց` հակադրվելով Կոնգրեսում Ցեղասպանությունը ճանաչող բանաձեւին»,- ընդգծել է Ա. Համբարյանը:
Հարցին, թե Քլինթոնը հայ-թուրքական հարաբերությունների վերաբերյալ ի՞նչ ուղերձ կհղի Հայաստանի իշխանություններին, արդյո՞ք կրկին հետամուտ կլինի գործընթացի վերսկսմանը, Արամ Համբարյանը պատասխանել է. «Հայ-թուրքական հարաբերությունները երբեք չեն բարելավվի, եթե Հայոց ցեղասպանությանը չվերաբերվեն ճշմարտության եւ արդարության դիրքերից: Թուրքիան, իհարկե, կբողոքի, բայց ամերիկյան քաղաքականությունը պետք է հիմնված լինի ամերիկյան արժեքների եւ շահերի վրա»:
Անդրադառնալով Ղարաբաղյան հակամարտության կարգավորմանը` Ա. Համբարյանը նշել է, որ այդ հարցում էլ ԱՄՆ վարչակազմը շեղվեց ճիշտ ուղուց: «Նախագահ Օբաման քարոզարշավի ընթացքում ասում էր. «Ես լուծելու եմ Լեռնային Ղարաբաղի հարցը ամերիկյան սկզբունքների` ժողովրդավարության եւ ինքնորոշման սկզբունքի հիման վրա»: Իրականում տեսնում ենք հայկական կողմի վրա անվերջ շարունակվող ճնշումներ, որը ժողովրդավարական չէ, սխալ է»,- նշել է Հայ Դատի հանձնախմբի գործադիր տնօրենը` հավելելով, որ եթե այդ նույն քաղաքականությունը կիրառվեր 1776 թվականին, երբ Միացյալ Նահանգները անկախության հռչակեցին, Ամերիկան կմնար Բրիտանական կայսրության կազմում:
Վաղը Հայաստան կայցելի ԱՄՆ պետքարտուղար Հիլարի Քլինթոնը: ԱՄՆ այդչափ բարձրաստիճան պաշտոնյայի այցը Հայաստան, իհարկե, նշանակալից երեւույթ է. պաշտոնական Երեւանը նման այցերից երես չի առել: Կառավարող շրջանակներին մերձ փորձագետները այցը գնահատում են իբրեւ Հայաստանի նախաձեռնողական արտաքին քաղաքականության հերթական վկայություն, մատնանշում, որ այցի շրջանակներում Քլինթոնը Երեւանում կգտնվի հուլիսի 4-ին` ԱՄՆ ազգային տոնի օրը:...
